أساسيات التعليم

كل حلقات ام وابنها لمس شيماء رشاد

كل حلقات ام وابنها لمس شيماء رشاد

أهلاً ومرحباً بكم في موقع نتعلم صح التعليمي، ننشر لكم اليوم كل حلقات ام وابنها لمس شيماء رشاد مسلسل حلقات مميزة وحوار كامل بين الام وابنها من تأليف وإعداد مس شيماء رشاد ، حلقات ام وابنها كاملة لمس شيماء رشاد ، مسلسل الحلقات كاملة وحوار من القلب بين الام وابنها ، يوميات أم وابنها هنزلها معاكم هنفكر مع بعض نعمل ايه ونستفيد منها ازاي وكمان هيبقي الجانب الديني و تعديل السلوك محور اليوميات تابعوني

الحلقه الاولي تعارف بالطلاب و تجميع آراء منهم للتعامل في الاجازه مع الولاد والمذاكرة والثانيه آداب الاستئذان وبعدها آداب الطعام وبعدها آداب النوم وآخيرا آداب الخروج من المنزل يعني ممكن نقول الخمس حلقات الاولى لام وابنها اولا المقدمة وآداب الاستئذان وآداب الطعام وآداب النوم والخروج من المنزل

الحلقة الاولى تعارف حلقات ام وابنها

#أم_وأبنها
صباح الخير ياحبيبي عامل ايه ؟ الحمد لله ياماما?
خلص فطارك وعوزاك في كلمتين ؟ايه ياماما كلمتين ايه قولي ياماما عملالي فاجأه?
لما تخلص ياقلبي? طب انا خلصت قولي بقي?ياريتني استنيتك لما تخلص انا ايه اللي خلاني استعجل بس ? قولي ياماما قولي قولي ??
طب هاقول اهو ?احنا فين ياحبيبي ?؟
احنا في بيتنا ?
ايوه صح ?طب اقولك السؤال بشكل تاني انت اخدت ايه ياحبيبي ?؟
اخدت شاور ياماما?
??لاياحبيبي صحصح معايا ابوس ايدك شويه ?
انا قصدي اقولك انت حاليا بتعمل ايه ؟
بسمعك ياماما ☺
????
طب بص من الآخر انت في اجازه ???
طب ماناعارف ياماما ?
كويس جدا انك عارف طب بنعمل ايه في الاجازه ?
بنخرج ونتفسح ونتفرج عالتليفزيون والكرتون ونلعب عالتاب ???
اه ياحبيبي اكيد ان شاء الله ? بس انا عوزه اقولك انك لازم تذاكر شويه يعني شويه صغيرين كده عشان متنساش الحاجات اللي اخدتها ياحبيبي?
ماتخفيش ياماما انا مبنساش ومفيش مذاكره في الاجازه ??
طب والجروبات اللي انا دخلتها كلها عشانك والبوستات والمشاركات والمذاكره اللي عماله اذاكرها دي وتلفوني اللي بيهنج عشان المعلومات الكتيره والمنهج والشرح اللي عالفون اعمل بيه ايه اشرح لمين انا ???
اشرحي لبابا او لطنط صحبتك وعيالها ياماما ??????
طب مفيش تليفزيون لحد مانتفق ??

إقرأ أيضا:شيتات وتمارين الماث KG تعليم الجمع والطرح بالصور

يلا نتفق ??
مستنيه تعليقاتكم فكروا في حل يتفقوا مع بعض عليه #الأم_وأبنها
واكيد هابقي معاكم كل يوم ان شاء الله نحاول نوفق علاقة الأم وابنها عشان مايخسروش بعض ??
معاكم
#مس_شيماء_رشاد?

الحلقة الثانية آداب الاستئذان

صباحكم سعاده ورضا ??
#آداب_الإستئذان
حبيت اصبح عليكم بشوية حاجات تقولوها مع الاولاد كل جمعه ان شاء الله نقول آداب وسلوكيات ممكن تكونوا بتعلموها لولادكم بس المره دي بشكل مختلف هنبدأ ب
#آداب_الإستئذان
طبعا متنسوش النفس العميق ? وكوباية الينسون عشان الصوت الجميل اللي هتبدعي بيه  هتفهمي ابنك او بنتك الاستئذان وهنستعين
طبعا يوميات #أم_وابنها ??
#مس_شيماء_رشاد
حبيبي النهارده الجمعه عاوزه اقعد معاك افهمك كده حاجه جديده ??
اتفضلي ياماما بس بسرعه عشان انا مش فاضي?
وراك ايه?
مورايش حاجه ?
طب بص لو حد عاوز يدخل الحمام ينفع يفتح الباب ويدخل علطول ??
لاء طبعا لاء مينفعش ?
طب ايه الصح?
لازم نلبس الشبشب الأول?
?? بعد ماتلبس الشبشب ?
لازم نخبط ياماما??
شطور حبيبي خالص بجد افحمتني قصدي شكحتني او فرحتني واتيڤر ??
افرض لو انت خبط خبطه صغنطوطه واللي جوا مسمعش نعمل ايه ياحبيبي?
نفتح ونقفل بسرعه ياماما ?
لاء مش ممكن يا حبيبي ?
ممكن اخبط خبطه كبيره ولا خبطتين او اطبل عالباب ياماما ?????
?? لاء يا حبيبي مش للدرجادي انا عاوزه اقولك هما ٣مرات بس وتكون مسموعه ولا جامده اوي ولا خفيفه اوي في الوسط ?تخبط عالباب و مفيناش من الزق فاهم?? ولا باب اوضه ولا حمام ولا باب شقه حتي لو كان مفتوح شويه عند تيتا وجدو او عند الجيران انت فهمتني ?
حاضر ياماما بس انا عندي حل تاني ?
ايه يا حبيبي ?
هاتيلي طبله عشان افرض وانا بزوق ?? قصدي وانا بخبط الباب اتفتح غصب عني اعمل ايه بقي ساعتها???????
????? عملك اسود ??

إقرأ أيضا:تعليم كتابة الحروف العربية للأطفال pdf

#مس_شيماااااااء_رشااااااااد
طبعا انتم متوقعين اللي حصل ????
غنوا معايا ?
??دق دق دق ٣مرات ???
قبل ماتفتح اي باب ??
اوعي تزوق الباب او تفتح ??
من غير ماتخبط عالباب ??
استنوني كل يوم في جديد ??
#مس_شيماء_رشاد ??

الحلقة الثالثة آداب الطعام

جمعه مباركة أحلي ماميز ??
تابعوا معايا الحلقة التالته من حلقات #أم_وابنها??
#آداب_الطعام
#مس_شيماء_رشاد?
حبيبي الصغنون عامل ايه ?
الحمد لله ياماما ?
هو احنا لما بنقعد قدام الاكل بنعمل ايه الأول?
بنغسل ايدينا ياماما ?
طب وبعد كده ?
ناكل بقي ياماما ??
طب بنقول ايه قبل الاكل ?
بنقول بسم الله بسم الله احلى كلام اتعلمناه خدناها في الحضانه ??
??شطور حبيب ماما?
بس هنزود عليه دعاء صغنطوط حلو اوي عشان ربنا يبارك لنا في الاكل الحلو ده ويرزقنا عشان نشتري كل مره اكل حلو تاني هتقول معايا ولا ايه ?
اه يا ماما هقول عشان نجيب اكل اكتر وجميل عشان انتي بتعمليه جميل??
حبيبي تسلم ?? قول ورايا??
اللهم بارك لنا ____________ اللهم بارك لنا
فيما رزقتنا ______________ فيما رزقتنا
وقنا عذاب النار ________ وقنا عذاب النار
وبعدها تقول بسم الله ?
هو كده بس شفت حلو ازاي ?
اه ياماما جميل بس خايف انسى والاكل يقل ومش يزيد?
لاء يا حبيبي انا وبابا هنفكرك دايما بس بشرط خليك واخد بالك لو احنا نسينا نقول انت فكرنا اتفقنا ?
اتفقنا ياماما ده انا علطول هفكركم ??
وخلي بالك وانت بتاكل تاكل من قدامك وبايدك اليمين زي ما الرسول صلى الله عليه وسلم قالنا “” ياغلام سم الله وكل بيمينك وكل مما يليك “” متفق عليه
الله ياماما الحديث ده خدناه برده في الحضانه والمس بتقوله كل شويه كل شويه ?
جميل ياحبيبي عشان تحفظوه انت وصحابك
طب بعد ماتخلص الاكل لازم تعمل ايه
اغسل ايدي ?
وقبل ماتغسل ايدك ?
اعمل ايه اشيل الطباق معاكي ?
اه اكيد هتشيل الطباق? بس قبلها بشويه هنقول ايه
اقول الحمد لله?
اخيرا يامطلع عيني ? صح هنقول الحمد لله بس زود عليها حاجه بسيطه خالص عشان نبقي بنشكر الله عز وجل علي نعمة الاكل والشرب قول ورايا ??
الحمد لله ____________ الحمد لله
الذي اطعمنا __________ الذي اطعمنا
وسقانا_______________ وسقانا
وجعلنا مسلمين _______ وجعلنا مسلمين
انا هقوله لكل صحابي بكره ياماما ??
قول يا حبيبي قول ??
تابعوني كل جمعه بآداب جديده وحلقه جديده من حلقات #أم_وابنها??

إقرأ أيضا:أقوى مذكرة أسئلة عربي كي جي 2
الحلقة الثالثة آداب الطعام
الحلقة الثالثة آداب الطعام

إقرأ أيضاً:-
مذكرة تاسيس اللغة الانجليزية للصف الاول الابتدائي
أهم 100 كلمة انجليزية يجب على الطفل حفظها
ملف هام لتعليم الاطفال اسماء الاشهر الهجرية
اشهر 1500 كلمة انجليزية للاطفال بالصور الملونة
مذكرة connect kg2 الترم الثانى 2020
مذكرة تأسيس انجليزي للاطفال فونيكس و جرامر وحفظ كلمات
كراسه واجب كونكت للصف الثاني الابتدائي الترم الثاني
جرامر وكلمات منهج كونكت للصف الاول الابتدائى ترم ثانى الجديد
مذكرة تأسيس طفلك فى اللغة العربية بكل الحروف
39 طريقة لتعليم القراءة والكتابة
مذكرة فونيكس تاسيس انجليزي كي جي

الحلقة الرابعة آداب النوم

مساء الخير عليكم جميعا?
معاكم الحلقة الرابعة من حلقات #أم_وابنها?? مع #مس_شيماء_رشاد?
#آداب_النوم?????
يلا ياحبيبي نراجع عاللي اخدته انهارده في المدرسه قبل ماتنام ??
ماما انهارده أول يوم ومش خدناش واجبات نعملها ??
يعني ايه ??
يعني هتفرج عالكرتون قبل ماانام ?
طب مفيش سهر ?عشان تنام بدري وتصحى بدرى مش زي انهارده طلعت عيني عشان تروح المدرسة?
ماشي ياماما ?هخلص باور رانجز وماشا والدب و الخارقين ونينچا ستيرو وعهد الاصدقاء وهنام علطوووووووول ??
ايه ??كل ده لاء طبعا انسى الكلام ده خالص? هتختار أول اتنين منهم بس ونقفل علطوووول ياإما هقفل دلوقتي التليفزيون خالص ?
ماشي يا ماما بس اول ما تقفلي التليفزيون تديني التليفون العب بيه شويه ? ??
ياواد هتجننني ? ?? افهم بقى لازم تنام عشان تصحى بدرى ?
ياللا قوم عشان هاقولك على حاجه جديده نعملها كل يوم قبل ماتنام ??
انا عارف ياماما لازم ادخل الحمام واغثل ثناني ??
لاء حاجه تانيه جديده ياحبيبي يالا نقولها بس استني اما اشرب كوباية الينسون? ? إحم إحم ??
قولوااااا معااااايا ???
ننفض السرير باسم الله ☝3 مراااااااااااااااااااااات
وايدي اليمين✋ تحت خدي اليمين وانام على السرير ?
وأقول الدعاااااااااااااااء? باسمك اللهم وضعت جنبي
اللهم باسمك اموت واحيااا??
واقول 3مراااااات اللهم قني عذابك يوم تبعث عبادك
واقرأ الفاتحه وسورة الإخلاص والمعوذتين ??
ويلا مع السلامة تصبحووووووووووا على خييير ??
????????????????
تصبحوا على خير مع حلقة جديده وآداب جديده كل جمعه??#أم_وابنها??
ان شاء الله انتظروووووني ??
للمزيد تابعوني??? #مس_شيماء_رشاد?

الحلقة الخامسة الخروج من المنزل

مساء الخير آحلي ماميز ?? جمعةمباركة عليكم ?
مين مستني الحلقة الخامسة من حلقات #أم_وابنها??
و #مس_شيماء_رشاد? وحلقة جديدة مع #آداب_الخروج_من_المنزل
انهارده هنروح لجدو وتيتا يلا ياحبيبي جهز نفسك?
انا جاهز ياماما ?
ايه ده هتروح كده طب ماتلبس حاجه من لبس الخروج مش لازم الترنج يمكن نخرج نتفسح مثلا ?
???هيييييييييه انا هلبس كل الهدوم ياماما ياآحلى ماما في الدنيا ??
لاء مش للدرجادي? انت اختار طقم ووريهوني واقولك رآي وبعدها تلبسه?
طب ياماما يلا عشان انا لبست ?
بسرعه كده ? مش ممكن انت سريع جدا بس شاطر انك لبست طقم مظبوط ولايق علي بعضه انت ذوووقك جميل ??
ماما انا واقف ادام الباب لو ماخلصتيش بسرعه همشي ومش هاخدك معايا ??
نعم ? هو مين واخد مين? ومين هيروح مع مين? يابني دانا الكبيره ??انا اللي هاخدك معايا انت مش فاهم اني مامتك ولا المعلومه دي صعبه بالنسبالك ???
يلا ياماما يلا ياماما يلا يا ماما ??
خلاص يلا بينا ياحبيبي هافتح الباب اهو اطلع عشان اقفل الباب كويس?
?????هنخرج ??هنخرج ??هنخرج
استني ياقلبي في حاجه مهمه احنا خرجنا من البيت صح ✔
صح ياماما ✔
لازم نقول الدعاء عشان ربنا يحفظنا ويبعد عننا اي آذي ممكن يصبنا ويحمينا من اي شر ونفضل في حفظ الله عز وجل لحد مانرجع ان شاء الله ?
طيب ياماما قولي بسرعه عشان مانتآخرش ??
قول معايا وانتواااا كمااان ورااايا???
بسم الله —————————- بسم الله
توكلت على الله —————— توكلت على الله
ولا حول ———- ولا حول
ولا قوة ———— ولا قوة
إلا بالله ———— إلا بالله
يهمني رآيكم ??
نتقابل الجمعه القادمه مع آداب جديدة وحلقة جديدة
من ??? #أم_وابنها??

الحلقة السادسة آداب الزيارة

معاكم الحلقه السادسه ??
#آداب_الزيارة?
#أم_وابنها??
?حبيبي احنا طالعين عند صاحبتي هنزورها ونروح علطول وعوزاك تبقى هادي وامور كده عشان خاطري ??
?حاضر ياماما ??
?ازيك ياحبيبتي عامله ايه
? الحمدلله ياقلبي اتفضلوا وايه العسل ده ربنا يباركلك فيه هادي اوي خالص هو كده علطول ?
? اه جدا اوي خالص ده انا هجنن من كتر هدوءه ??
? اتفضلوا شيكولاته خد ياحبيبي
? مابلاش ياخد هو ?اديله انتي واحده وخلاص?
?لاء ازاي اتفضل ياحبيبي خد اللي انت عوزه ?
?الله كل دي شوكولاته ? انا هاخد دي? ودي ?وكمان دي? ودي برده? وحلوه دي? ودي? كمان الله ودي? بقي احلي منهم كلهم? ودي برده ???
? ياااخبر انت بتعمل ايه ?????لاء حطهم وخد واحده بس ??
? ليه ياماما بقي ?????ماليش دعوه
? خلاص يابنتي سيبيه ??
?ماما ياماما ده عندهم عجله هلعب شويه ?? معلش ياطنط اتخبط في الدولاب بالعجله خلاص هلعب حاجه تانيه
? ايه ??
? معلش ياقلبي انا لازم امشي ??
?الله حلوه الدباديب دي طنط طنط طنط عاوز العب عالكمبيوتر? لاء خلاص لقيت كره ⚽
?يلا قدامي عشان نمشي معلش انا اسفه ياحبيبتي ?
? لاء ياقلبي انتي نورتيني وربنا يهديه متزعليهوش طيب
?لاء مش هامشي ???????⚽ لما اخلصث لعب
? حلو اوي انا ماشيه وسيباك وطنط جوزها جي هيعلقك في النجفه عشان البهدله اللي انت عملتها مع السلامه ?
? طب حبيبتي مع السلامه ?
? خلاث انا جي??
? اعدل الحاجه اللي وقعتها ورجع كل حاجه مكانها لو سمحت قبل ماتنزل
?حاضر ياماما?
? خلاص ياحبيبي مع السلامه ?
?اللي انت عملته ده غلط ولا صح
?غلط ياماما??
?انا زعلانه منك جدا انت احرجتني قدام صحبتي وباباك لو عرف هيعاقبك جامد ??
?لاء ياماما عشان خاطري متقوليش لبابا ???
?طب هتسمع كلامي واللي اقوله تنفذه ?
?حاضر ياماما انا اسف ومش هاعمل كده تاني خالصث
?طيب قول ورايا وانتوا كمان معايا ?
ومتنسوش الينسووووون ?
??غنوا معايا
????
لما نكون في زياره لحد//////////// لما نكون في زياره لحد
ابقى مؤدب فوق الحد //////////// ابقى مؤدب فوق الحد
اعلي صوتي ////لاء لاء لاء
اكني في بيتي////لاء لاء لاء
طب اعمل دوشه////لاء لاء لاء
اكني في ورشه /////////لاء لاء لاء
طب اجري والعب//////////لاء لاء لاء
اكني في ملعب //////////لاء لاء لاء
ولما حد يقدم حاجه اقوله ايه //////جزاك الله خيرا
????
للمزيد تابعوني ?? #مس_شيماء_رشاد?
يهمني رآيكم انتظروني كل جمعه ان شاء الله ??

تابعوني ???? كل يوم جمعة مع حلقة جديدة على الرابط دا الحلقات دى متجددة بشكل مستمر وهضيف فيها كل حلقات #مس_شيماء_رشاد? من جروبات نتعلم صح التعليمية المميزة للاطفال ، اعملوا للموضوع دا بوت مارك او احفظوا الموضوع فى المفضلة واحفظوة فى الجهاز وافتحوا الموضوع دا على طول

 

السابق
المفرد والجمع شرح شامل للصفوف الأولى الإبتدائية الجزء الثانى لمس شيماء رشاد
التالي
5 ورقات روشتة نحوية سحرية شرح الأسماء الخمسة من أ/ جمعة قرني

اترك تعليقاً